خذها نصيحة ياولد مادام مانت بقدّي=لا تحكي بطبعي وطبعك باللقاء ولاّدي


والا أنا طبعي ورثته من أبوي وجدّي =وورثت منهم قزّتي وفزّتي برقادي


والشعر اتقنته غصب واصبحت به متحدّي=اكسّر ابياتي وامشّيها على نقّادي


اختار صعبات القوافي وانطلق واهدّي=أغمّض عيوني ولكن إصبعي بزنادي


وامشي بكيفي اقف بصفّي أو اقف ضدّي =واقف بكيفي امشي بصفّي أو امشي غادي


يعني مميز مختلف مغرور لكن ردّي=عليك يا (بابا) مميّز مختلف (موش) عادي


وان كان قصدك باتّهامي شي يفسد ودّي =مع ناس ارباب لسوابق اسمهم حسّادي


شي راجع لذاتي أمشّيها وإذا ما ودّي =ما راح امشيّها وراح اتعّبك بعنادي


وما يعرف عنادي سوى من ذاق حرّة صدّي =قدله ثلاث سنين متلهّف على ميعادي


وانا عليه من السماء ابعد وهذا حدّي=بعدي عليه من المحيط الاطلسي للهادي


ولاجيت تبحر في مياهي انتبه من سدّي=لا تحسب ان بحري صغير او تحسب انّه وادي


أخشى عليك من الدّوار اليا حذف بك مدّي =ومن الجزر أخشى عليك ومن فكر الحادي


والنّاس.. تتجنب تصير ان جا تصادم ندّي=أو بالأصح الناس تتجنّب تصير اندادي


مدري كذا والا كذا هذي كتابة يدّي =حتى القواعد واللّغة أصيغها.. بمرادي