مضت بدري ثلاثيني وانا واقف على الأحزان=أشيل بداخلي قلب(ن) ثقيل بسبّة أحزانه


وترى لا شفتني ضايق فلا تزعل علي( سلطان)=ولا تحسب بان دمعي على (شيخة)و(سلطانه)


أنا أبرك أشيل الحمل وان كانك تبي البرهان=تعال وشوف كيّات الزمان وشوف برهانه


واذا كانك تبي قصّة ثلاثيني مع الأزمان=تعال اجلس تعال أسمع شقى عمري وأزمانه


انا واحد مثل غيري ربى جنبه عشر غرّان=وابونا العود كم ضحّى لاجل اسعاد غرّانه


وانا واحد بدا بدري يحس بلوعة الحرمان=عسى غاليك ما يطعم مثل جوعه وحرمانه


يمر اللي وتشوفه مع نجوم السما سهران=وعيونه من عنا الاهات واللوعات سهرانه


تعدّى مرحلة انه يوطّي نفسه لانسان=وتعدّى مرحلة انه يموت بحب إنسانه


تعلّم كيف لا شاف الفقير المنهك التعبان=يراعي وبأدب مطلق مشاعر ناس تعبانه


بدا يكبر بدا جرح (أ)تّفرّع منه الأغصان=وهو جرح وكسر ظهره فما بالك بأغصانه


بدا يرسم أماني كثير ويزيّن بها البنيان=وفي لحظه حدث زلزال هدّم كل بنيانه


وقف شامخ على أنقاض مستقبل على الجدران=وهو ضايق ومتأثّر على انقاض جدرانه


صحيح انه عرف انه غدا في دنيته خسران=طبيعي من صغر سنّه وهو دنياه خسرانه


وترى والله (يا سلطان) لولا نعمة النسيان=فلا يقدر على نسيان ماضي صعب نسيانه


درست فهالحياة شلون أفسّركلمة الأوطان=إلين أيقض مفاهيمي (علي السبعان) واوطانه


يمر الوقت والدنيا تعلّمني من الغلطان=ومع الايام أتفاجأ بأن دنياي غلطانه