الشعراء المشاركين في الحلقة العاشرة من حلقات شاعر المليون

سعود العواجي العنزي ( المملكة العربية السعودية )
سلطان الأسيمر المطيري ( الكويت )
عبدالله محمد سالم الجابري ( الامارات )
محمد فهد اريتان العرجاني ( الكويت )
مستورة ضويعن الأحمدي ( المملكة العربية السعودية )
نايف بن عرويل العتيبي ( المملكة العربية السعودية )


قصائدهم :



سعود العواجي العنزي
السعودية

يا هاجسي لا هنت وردني على العد القراح = وخل المشاعر كل ما جفت تبل عروقها  


شاعر وأغني في زمان العولمة والانفتاح = لكن فكري ما نسى الدحة ولا طاروقها  


اخطي واعاتب خافقي وأطلب من الله السماح =.وآخذ حقوقي في يدي وأعطي الرجال حقوقها  


يا كم رجالٍ حفظته داخل عيوني وطاح = ويا كــم رجالٍ حفظته واستقر بموقها  


زرعت هقواتي على قلوبٍ مواردها شحاح = ولا نبـت فيها من الاخلاص شي يروقها  


سفينة أحلامي ولو تمشي على عكس الرياح = مصير حظي لا ضحك وقتي علي يسوقها  


آخايل مزون الأمل على مشاريف الكفاح = يالله عساها تنهمر من بعد نوض بروقها  


الياس يغلق خافقي والصبر يفتح لي نجاح = لأن نـفسي نخـلةٍ خضـرا تزم عذوقها  


تخاف من ناسٍ تعيش الليل وتنام الصباح = وتجهل مآربها وما تخفي وسط صندوقها  


ناسن تساوم بالحرام بحجة الطرح المباح = حتـى قـدرت تبيع سلعتها وينمو سوقها  


صار تغانم منهج الإقناع باسلوب الصياح = وإرضـائها كـايد ولا تقـدر تسد حلوقها  


كلامها يطعن شريعتها مثل طعن الرماح = ولهــا سنين تنفخ بسرد الكلام شدوقها  


أقلامها تنزف مثل ما تنزف الامة جراح = وأفكـارها ضحلة ولا يمكن تخيط افتوقها  


الغرب لبسها من التخوين والذلة وشاح = وكرس مفاهيم التخلف في مدارس ذوقها 


يالله عسى بعد الضلال يعمها نور الصلاح = يمكن تتوب وتستحي من ربها اللي فوقها 

المجاراة :

- الأبيات المطلوب مجاراتها لـ سند الحشار الظفيري :

المدح ما ينحر الدوني =والطيب بالعين ينشافي

- أبيات المجاراة لـ سعود العواجي العنزي :

غنى الظفيري على أوني =ونسجت من فكرته قافي  


جريت بأسبابه لحوني =وغنيت من فوق مشرافي  


لو كان ضايق ومغبوني =أهل الوفا علمهم وافي  


والطيب لو غاب مضموني =في صدر رجالٍ سنافي  


وأنا ليا طحت شالوني =ربعي هل الموقف الضافي

****



سلطان الأسيمر المطيري
الكويت

لا هز جنح الليل جذع التعابير = واجتاحت السيرة هدير الثواني  


للحلم في روح التحايا تباشير = للدمع ذكرى في رصيف المواني  


تحركت بالذاكرة حفة البير = اللي شكت بعد الرشي والسواني  


ضيم الدهر جور العطش رحلة الغير = وحكاية الغربة وصوت الأغاني  


كم روحوا منها عسوس ومصادير = وكم لوحت قبل الظما للأماني  


كأنها فتقة نحر بين ازارير = تجويفها فجر عروق المحاني  


استوطنت صلبٍ حمر شب من جير = صما صخوره والقشور الأواني  


تكسرت أطرافها دون تبرير = وتقمصـت جيّانها شكل ثاني  


هذي من الصمان لمحة أزاهير = يطغـى على حوذانها قحوياني  


كانت أهازيجه هبوب ومعاصير = تولـيف سيل فالدروب المعاني  


للكمبري به تيش للدفن للسير = مـراحلٍ عـدة تلتـها مباني  


عن عزته كم حدثتنا الأساطير = وعن شيمته ياهي دموعه تعاني 


من تربته سمرة جباه المناعير = وفي رفته تصغر كبار الصواني  


لمعة سماه سيوف هند وسعاطير = كنه يقول الموت من دون شاني  


ولرخى فجوجه وانطوى تحته عصير = تسللت روح المسـا في كياني  


ناديت يالصمان تصبح على خير =.يا أغلى وطن في راحتيه احتواني

- الابيات المطلوب مجاراتها لـ دخيل الله بن مرضي :

ذبحتني يا دقيق العود = وأنا احسب انك تداويني  


ذبحتني بالعيون السود = والسلهمه يا بعد عيني

ابيات المجاراة لـ سلطان الأسيمر المطيري :

غنى الدجيما ولع ياسعود = وجاريت من حر ما فيني  


الجود ماهو من الماجود = ضامي عسى البعد يرويني  


لا هز جذع الغرام النود = ناديت وينه  وأنا ويني  


بيني وبينه حجى وقيود = واطلال الاوجاع  ترثيني  


لو هو صحيح الغلا به فود = ما غاب والحزن يطويني  


ألعن محبة هوى مفقود = لا صرت اعيشه وناسيني

****



عبدالله محمد سالم الجابري
الامارات

يضيق وجه السما من زحمة الليل = ويضيع منه الامان ويسكنه خوف  


لا صرت اخر أمل للناس لا تميل = حاول تحقق من المجهول معروف  


على الأقل لا طروك فغيبتك قيل = نسج من احساس قلبه للشتا صوف  


أبكسر الليل من حولي بقنديل = مـدام فكري سراج وضوّه حروف  


و ابنثر النور فـ وجيه الغرابيل = مدام فيّ لثـرى هـ الدار معروف  


للي خذاه الظلام بـ غفوة مقيل = وما نبهه للضيـا تـلويحة كْفوف  


أسرف بدينه ودين الله تْساهيل = وميـل عن اللي يراه العقل مألوف  


هو يدري الدين رحمة هوب تنكيل = يا غـير وده يبيـن فكره العـوف  


لي صار يزرع فـ اراضي العلم تضليل = ويسقي تراب العبادة جهل وحسوف  


حتى غدى الظلم في زرعه محاصيل = ظنه جمع صف  لكن فرق صفوف  


متى بيمطره جوه للهدى مخيل =ومتى بيعزف على اوتار الندم أوووف  


الحمل من ترفعه ماظني ثقيل = بس طول رفعتـك له  بيتعب كتوف  


يا كم عارض ولاة الامر فـ الكيل = يحسب ولائه لهـم من شيمة ضعوف  


تدرون شـ اللي يميل سعْف النخيل = مالت تقبـل تراب الأرض  وتحوف  


كيف انه الطيب يتعب حمله الحيل = مثلي  غديت لأماني الشعب مكلوف  


أهدتني الناس قبل أحلم تأويل = خلوني أحلم بالأول  عـقب باشوف  

المجاراة :

- الأبيات المطلوب مجاراتها لـ محمد بن أحمد السديري :

تلعب بقلبي وانا اطيعك =وانت سبب كل ما جاني  


انا اللي اشريك ما ابيعك =لو كثروا فيك الاثمانِ  


وصارت لغيري منافيعك =عقب الغلا كيف تنساني

- أبيات المجاراة لـ عبدالله محمد سالم الجابري :

الحب دمر مشاريعك =وأسقاك ضيقة وحرماني  


شفني على حل تطويعك =يا امير  ليتك بتنهاني  


يا امير خلي شرى ربيعك =خفيت اسمه بـ قيفـاني  


يا كم قت له : أبضيعك =عسى تـدور  وتلقاني  


سبعين ليلة وأنا اشيعك =وسهيل غـطته الامزاني  


من بعد ستة فـ اسابيعك =وجمـال حزني اتعناني

محمد فهد اريتان العرجاني
الكويت

هلت أمطار السعادة على الغصن الحزين = وأرتوت منها عروقه وعانق فرحته  


قام يطرقه التفاؤل ويجذبه الحنين = وراح يشرح للطبيعة فوايد ثمرته  


تدفعه روح العزيمة على الراي المكين = وفي عيون العلم تسبح معاني نظرته  


العقل كنز ومفاتيحه الفكر الذهين = يصقله سيل التجارب وتثمر شجرته  


مركب الأحلام يبحر على مر السنين = يخترق صدر العواصف وتمضي رحلته  


منطق الأمجاد ما يقبل العذر السمين = دام به من يعترف به  ويتبع خطته  


رأس مال الفكر ثروة يقدرها الفطين = والتنافس  ميـزة اللي يقدر ثروته  


والعقول اللي تهاجر سببها حاجتين = قرب نظرة مجتمعنا  وقـلة خبرته  


استفاد اللي جذبها وحنا غافلين = عذرنا منها  زمنا وشـدة قـسوته  


الزمن ماله علاقة بخذل المبدعين = أشهد أن ماهو بـ ذنبه ولا هي غلطته  


لو يحس الوقت في دمعة عيون السجين = كـان ما زادت جروحه وسالت دمعته  


في صراع الحلم ما مات مكتوف اليدين = لو تـلاشت فـكرة الحلم تظهر فكرته  


مولد الإنجاز بهجة ومحصوله ثمين = وإن تكاتفنا على الخير نحصد بهجته  


هكذا نسمو على الجهل بالعلم المبين = ونطـلق عنان التطور وتكسب مهرته  


قلتها مانيب عالم ولاني شيخ دين = لكن العاقل نضوجه  نتـاج لحكمته

المجاراة :

- الأبيات المطلوب مجاراتها لـ محمد بن لعبون :

حي المنازل تحية عين = لمصافح النوم سهرانه  


والاَّ تحية غريم الدين = معسر و وافاه ديانه  


منزل فريد البها والزين = عطبول مكحولة اعيانه  


ودي بنسيانها ومن اين = ينسى محمد لخلانه

- أبيات المجاراة لـ محمد فهد اريتان العرجاني :

مرحوم يا شاعر الجيلين = ذكرني الحب واشجانه  


وأنا من أول مع السالين = والقلب قـفلت بيبانه  


حتى عشية مسا الاثنين = هيضني الشعر والحانه  


ذكر علي ناعم الخدين = جعل الحيا يسقي أوطانه  


اللي غيابه ثلاث سنين = أدهر بقلبي وريضانه  


يا ليت للحب قاضي دين = يرجح الحق بأوزانه

****



مستورة ضويعن الأحمدي
السعودية

يا أماني تبنت كل حلمٍ سعيد =في كنف لطف من يخرج من الميت حيّ  


انحنى ظهر كفي لإتجاهٍ وحيد =وهل غيث استجابة هـزّ قـاعي بريّ  


نبض بينه وبينه دم قلبي بريد =راف به وهـن روحي قبل راحة يديّ  


بين شريان حب وبين لهفة وريد =مـرجح القـلب واقفز من خيالي إليّ  


أول العمر صرخة فك ريق النشيد =رد ضحكـة فـم الوردة لقطرات ميّ  


توأم الفجر ياوجه الحياة الرغيد =منهو اللي سبق منكم وصبّـح عليّ  


بك تنفس صباح وقام حظٍ بليد =صـح عمـرٍ تثاوب كحل العين ضيّ  


إيه يا طفل لبّس دنيتي ثوب عيد =فـاز في عرض زينتها على كل زيّ  


( ضمني لين ترويني محبة وزيد =داخلي طفل أصغر منك يحتاج بيّ 


صيح واحتج واكسر فل صمت الحديد =ضقت من وحدةٍ خرسا لها الدمع خيّ  


شق صفر الدفاتر ثور ثورة عنيد =وأضحك بحب يضحك لي معك كل شيّ  


كفر القيظ عن ذنبه بطلعٍ نضيد =وصارت ايديك أغصان ومحانيك فيّ  


كل عامٍ ويقصر ثوب طفلي الجديد =وانطوى عقد مع نيّف من العمر طيّ 


مر بالطيش واقصر وإن دعاك لمزيد =كون فارق ولا تلبس على الرشد غيّ  


لا تعالى على دمعك بحجة شديد =لا تظـن البطولة هد و أبطش و عيّ  


في هوى النفس آفة كل رأيٍ سديد =والمحبـة علاج  واخر الطب كيّ  


طير بجناح ايمانك وعزمك بعيد =كم طموحٍ لـوى يد الصعيبـات ليّ  


وأترك اسمك احني به كفوف القصيد =لأن كل المتاح لـرسم بعضك شويّ 

المجاراة :

- الابيات المطلوب مجارتها لـ علي إبراهيم الايدا :

الزين مثل الحيا متبوع =لو ما تلى الناس يتلونه  


والشين مثل المحل مقطوع =يمشون لين ايتعدونه  


من ذاق حب امهات اردوع =أهل الهوى ما يلومونه  


يا شوق عنك الخطأ مرفوع =وأنتِ عن الشين مصيونه

- أبيات المجاراة لـ مستورة ضويعن الأحمدي :

بعض البشر يعشق الممنوع =تلعب باحاسيسه عيونه  


لو شاف الايدا حلا مصنوع =غيّر مسـارات قانونه  


وإن قيل زين الرجال طبوع =.وش وسم من زان مضمونه  


كم وجه منه الحياء منزوع =بـ قناع جذاب يخفونه  


احذر وتسلم خطاك الروع =يا قلب زينة فـ مكنونه  


دام الهوى خادع ومخدوع =أبعد عن الحب وطعونه

****



نايف بن عرويل العتيبي
السعودية

يا بنات الفكر منصاة العروش =والعرب ما بين قال وبين ويش  


درهميهم مثل درهام الطروش =لين يظهر للجموع الدهم جيش  


عوهلية وانسبوها في كروش =والخطا صار اعتذاره ما عليش  


لو يمر الموت من بين الرموش =راحت الرديان فالماقف طشيش  


ولو يدوس الموت قواد الجيوش =ما يموت الذل في قلب الخريش  


ما نكب صدام غير اذناب بوش =ولا نكبني غير طيبي مع غشيش  


الفعول تبين والطيب يشوش =والأصايل ما تقارن بـ الكديش  


والفروخ تفر وتعاف العشوش =ولا خبرنا طار طير بدون ريش  


يا شعام الحرب والقلب مخروش =ما كليت من الوجيه السود عيش  


حملوك الرث من رث العفوش =والحمول تهد يالعظم الهشيش  


والجثث ما شالها غير النعوش =والنعوش أصنام لاشح الدقيش  


والعرب تعرف مقامك لو تهوش =حيةٍ ما فادها كثر الوشيش  


لو تجيب الهرج والهرج مغشوش =من يشكك في محمد من قريش  


لا تعرش العظم والعظم معروش =لو تقول الجوع قلت الذل ليش  


من يبيع اسمه على شان القروش =فالحرام أنه على الدنيا يعيش  


تجربة للنادرات من الوحوش =فارقة ما بين عقل وبين طيش  


ما نكب صدام غير اتباع بوش =ولا نكبني غير طيبي مع غشيش 

المجاراة :

- الأبيات المطلوب مجاراتها لـ عبدالله الأشقر :

يا زين كاني بعد حيك =لا تذبحن وأنت تغليني  


أخاف أنا اموت بيديك =صبري قضى يا نظر عيني  


لو قدّر الصبر عن غيك =ما شفت الاوهام تسنيني  


صد أبثناياك وشفيك =لا صار منته بْـ بمعطيني

- أبيات المجاراة لـ نايف بن عرويل العتيبي :

يا ناعس الطرف من زيك =يميتني ثم يحييني  


اخذ المعاني معانيك =لا تاخذ الجانب الديني  


ترجع لي الروح بمجيك =من عقب ما الموت طاويني  


ليل الدجى يكسحه ضيك =وليلك ظلامه  يقديني  


تعبت شمسك وأبي فيك =فـ المعمعة لا تخليني  


يقول الأشقر ورح شيك =تلقاه وسط الدواويني  


يازين دامي بعد حيك =لا تذبحن وأنت تغليني